1. RAZNO

Dvoboj u zoru

Utakmica je počela točno na pet jutro. Pravi dvoboj u zoru! I za ne verovat bilo je i publike, ča z drugeh brodi, ča domaćih Sudanci

Malo je porti na svitu bez kluba za pomorce popularnoga Seamen's cluba. Obično su va samen portu ili jako blizu porta. To su pristojno uređeni klubi ki imaju razneh sadržaji, od sportskeh do društveneh. Drže ih uglavnom vjerske zajednice, katoličke, anglikanske, protestantske, a negde se za njih pojida država, kod na primjer va Rusije. Odvavik otkad postoje ovi klubi, pomorci su tu mogli doć kod doma, pročitat novine, časopisi, normalno na englesken, mogli su se telefonon javit doma, mogli su tamo i kartolinu kupit i inpoštat, a ča je najvažneje nakon pitaj boga koliko vrimena na brodu tu su mogli osjetit domaću atmosferu.

Normalno, tu se nikad ni točil alkohol, ali moglo se je popit kafe, čaj ili sok, a neki od njih su imelii restoran kadi se je moglo i pojist neč da razbije brodsku monotoniju. Tu su se prikazivali filmovi, organizirale se zabavi pa čak i tanci! Tu se vavik moglo nać razneh nacionalnosti, od Evropljani, preko Indijci i Kinezi do Filipinci. Ma jednostavno rečeno, tu su se mogli nać svi ljudi ki su navigali. Na tomu neutralnomu terenu svi su se lipo družili i dobro slagali, aš niki maritima ne razumi ko drugi maritimo. Svi pomorci su odvavik imeli iste brigi i slični problemi.

Osoblje kluba su činili volonteri. Vavik ljubazni, nastojali su bit na usluzi pomorcima na sve moguće načine. Znalo se tako priko Seamen's Cluba organizirat izleti na lokalne znamenitosti ili posjet kazališnoj predstave. Pomagali su i pronać rodbinu ako ju je neki va ten kraju imel, i još puno, puno toga.

Normalno, kad su bili va Merike, Japanu, Južnoj Amerike, Australije ili po Nordu, Seamen's klub baš i ni bil neč privlačan, ma kad su se našli va Afrike, va Crvenen moru, Seamen's Club je bil pravi paradiso, raj zemaljski! Takov jedan bil je va Port Sudanu, nasred Crvenoga mora. Bil je smješten van porta, a opet ne dugo, na samoj morskoj obale, z velen bazenon, nogometnen igrališten, igrališten za odbojku, košarku, tenis, kriket...

Ta put va portu je, osin našega broda, bilo i drugeh: dva ruska, dva panameza, jedan talijan, i dva domaća sudanska ki su bili storeni kod nas tako da su na njima i barba, i kapo i ofičjali bili naši ljudi.

Va klupskomu bazenu je vavek bilo kupači. Plivalo se i skakalo, i to je va ono vrime bila jedina prilika za rashladit se. Istina je da je more bilo valje do bazena, i da su neki šli i va more, ali to je bilo opasno aš si se jako lahko mogal rasić na oštro kamenje, a čin si se našal va duboken tamo su čekali morski pasi.

Marin je saki slobodan trenutak provodil na bazenu, a kako je komunikativan, ni mu bilo teško nać društvo pa se tako sprijateljil z nekoliko Rusi i dve Ruskinje. Ruski su brodi va ono vrime skoro pod obavezno imeli ukrcanu i najmanje jednu žensku članicu posade ka je obično bila ukrcana ko belo osoblje. I Marin je upoznal obe...

- Zna se zač ti stalno visiš na bazenu... Briga tebe za bazen. Ruskinje su va pitanju! - malo zlobno ga je podbadal Andre.

- Ma ni to tako! Ja z Rusima dogovaran nogometnu utakmicu, i sad čekan ča će mi odgovorit.- pravdal se je Marin, iako mu niki baš ni preveć veroval, ili boje reć nadal da je stvarno toliko lud da će organizirat nogometnu utakmicu na takovoj teplini.

- Nogometnu utakmicu po ovoj žege!? Ma si ti normalan!?! Ki će poć igrat po ovakoven zvizdanu? Daj Marine, pa po danu je vane četrdeset i pet – pedeset! - jadil se je Andre. Ali Marin ne bi bil Marin da je popustil. I na kraju je z Rusima dogovoril utakmicu. I to na pet ur jutro! Čin su čuli za zakazani termin opet su svi poludeli, i oni ki su imeli igrat i oni ki su morda misleli poć gledat. Ali stvar je bila gotova. Dogovoreno je dogovoreno, a i barba je već dal blagoslov, a barba nikad od jezika ne dela lopatu! Večer se ni moglo igrat aš ni svitla i još je vavek teplo, a kako se tamo već na četire i pol razdani i malo rasfriška to je bilo idealno vrime. Dogovoreni su i detalji: igrat će se dva poluvremena po pol uri, na sakoj strane bit će po devet igrači skupa z golmanon, a sudit će jedan od osoblja Seamen's Cluba.

Utakmica je počela točno na pet jutro. Pravi dvoboj u zoru! I za ne verovat bilo je i publike, ča z drugeh brodi, ča domaćih Sudanci. Iako rezultat ni bil važan još i danas se sjećan da su naši zgubili... Ali, borili su se srčano! Ko i vavik bilo je onih ki su Marina zafrkavali da je zgubil utakmicu ku je organiziral, a on in je samo mudro odgovoril: - Morda mi i smo zgubili utakmicu, ali ostali smo zapisani da smo organizirali utakmicu ka je lahko mogla doć i va Guinnessovu knjigu rekordi! Kad si ti čul da je odigrana međunarodna nogometna utakmica u zoru, na pet jutro po lokalnen vremenu!?