1. Pomorska anegdota

Buzara

Srića i bog put do Japana je bil dug, a oni su tako obrašteni pomalo kapeđali pa su se barba i direkcija lipo naslali telegrami jedni drugin i međusobno naoptuževali i naneverovali

Zašli su va Indijski ocean, i puna tri meseca su se vrteli po njemu, i to ispod ekvatora. Na sriću monsuni su prošli, pa se teplina dala podnest. Nota bene, imeli su i air condition ki ih je hladil da je to bila divota, tako da je va salonu i kabinah bil raj zemaljski, ma va makine i na kuverte...

Šli su z Šangaja va Tamatave na Madagaskaru, i tamo su dvajset i pet dan skrcivali generalni karag. Onda su partili za Dar es Salaam va Tazanije za kamo su imeli ostatak karga. Tamo je, kod i na Madagaskaru, iskrcaj potrajal skoro mesec dan. I onda namesto da ukrcaju kakov karag za doma, oni su prazni partili za Beiru va Mozambiku, kade ih je čekala hrmenta odnosno kukuruz va vrećah za Japan. A svi su se već nadali da će ih karag dopejat napokon doma, ili baren va Evropu, da dospiju na vrime storit klasu i dokovanje.