Bandera na pol koplja..
BN 260
| 3.5.2023
| Piše:
Stanko Cuculić
| Foto: Pexels
Večer pred ariv va Cadiz, umrl je Franko. Kad je i BBC to javil znači istina, barba se zabrinul. Kako pilota dočekat, dali mu dat saučešće, dali banderu na krme na pol koplja spustit, ča sa španjolskun banderun na prven jarbolu.
Da dolaze va neki drugi porat va drugoj države, to bi bilo normalno, ne bi bilo problema. Kasno je direkciju pitat, dokle dobiju telegram i odgovore, bit će kasno, i ča bi direkcija mogla odgovorit. Sa Španijom nimamo diplomatske odnose. Pratika kad su zadnji put va Barcelone bili, pasala normalno, dobili su lašja pasare, niki ih niš ni pital. Ali onda je Franko bil živ, a sad kad je umrl, a mi mu davamo počast z banderun na po koplja? Ča mislite kako će na to gledat naše vlasti opet će barba.
